من الأدمن Jounex✨ | “إن طال الزمان ولم تروني فهذه رسالتي، فتذكروني~”

.

.

.

السلام عليكم ورحمة الله وبركاته

.

أولاً، أعلن عن انسحابي من المدونة بشكل رسمي ونهائي~

بعد فترة من التفكير الجدي بالموضوع واستشارتي لصديقتي المقربة، قررت إني أنسحب من المدونة بشكل كامل ونهائي.

للأسف، أنا أعرف إنه متابعين المدونة راح يزعلوا وأعرف إنه الخبر صادم خصوصاً بعد ما كنت ناوية استمر في المدونة، ولكن كانت لي أسبابي الواضحة لإتخاذ هذا القرار.

.

ثانياً، أسباب انسحابي من المدونة واضحة وصريحة، أتمنى تكون كافيه عشان تتفهموني وما تزعلوا مني~

خلال الفترة الأخير (السنة الأخيرة تحديداً) لي في المدونة، لاحظت أنا وباقي الأدمنز انخفاض التفاعل اللي أصاب المدونة، بشكل عام المدونة التفاعل فيها صار قليل ونادر. بعض التدوينات توصل 10 او 5 تعليقات لكن كل التعليقات هذي تعود لأقل من 7 أشخاص بالعادة، وبعض التدوينات الأخرى لا يوجد فيها تعليقات أصلاً وإن وجدت فهي أقل من 3 تعليقات.

انخفاض التفاعل في المدونة مع الوقت سبب لي إحباط وقل الدافع عندي إني أترجم هنا في المدونة، لما أترجم مقال مستخدمي الإنترنت واللي ممكن أحياناً يحتوي على أكثر من 7~10 تعليقات للكوريين (أو للصينيين أحياناً) وبعدين ما ألاقي غير 3 أو 5 متابعين يعلقوا، أحيانا اللي يعلقوا مش أكثر من 3 متابعين.

أنا أحب الترجمة، ترجمة أخبار ومقالات تتعلق بـ EXO تحديداً. لكن هذا الشي ما يعني إني أقدر أتعب وأترجم وبعدين ما ألاقي التفاعل اللي كنت أتوقعه، هذا الشي خلا الدافع عندي يقل ونسبة الإحباط تزيد، بكل جدية آخر مقال ترجمته وآخر تدوينات عن تيزرات اكسو حسيت إني قاعدة أترجم وأنزل الصور والفيديوهات لـ لا أحد.

يمكن بعضكم يقول إني بس أريد تفاعل وأريد ألاقي ناس تعلق على مقالاتي وترجمتي، لكن الموضوع أكبر من كذا. الموضوع مش إنه مقالاتي مافيها تفاعل، لا! الموضوع انه المدونة مافيها تفاعل، المشكلة انه بعض الأدمنز كانوا ينزلوا أخبار ويترجموا ويتعبوا ويعطوا المدونة والمتابعين الكثير من وقتهم الخاص بينما هم فعلاً محتاجين الوقت هذا لحياتهم، هم فعلاً مشغولين، سواء شغل ودراسة وأمور خاصة وظروف أو غيره، لكن مع ذلك حاولوا إنهم يعطوا المدونة كل ماعندهم، في الوقت الحالي تقدروا تلاحظوا إنه ما عدنا ننزل شي، وهذا كله بسبب إنه بعضنا مشغول بحياته الخاصة سواء شغل، دراسة أو ظروف خاصة، وبعضنا نفسيته تعبانه من كل شي.

.

ثالثاً، أنا ما أعاتبكم على أي شي، مجرد إني حبيت أوضح أسبابي ودوافعي لاتخاذ القرار~

أنا بس قاعدة أحاول أطرح أسبابي اللي خلتني أتخذ هالقرار النهائي، وإني أنسحب من المدونة، بصراحة بسبب إحباطي وإنعدام الدافع عندي ما راح أقدر أنزل شي للمدونة، أنا حاولت من قبل بكل ما عندي إني أرفع من مستوى التفاعل من خلال الفقرات الأخبارية والمقابلات على الأقل، عشان نحس إنه في عدد لا بأس فيه يشاركنا بتعليقاتهم ودعمهم لترجمتنا وأعمالنا في المدونة بس للأسف مع الوقت حتى محاولاتي بائت بالفشل، عشان كذا أنا ما أريد أحس بالذنب وتأنيب الضمير، كوني أظل موجودة في المدونة وأعتبر أدمن فيها بينما أنا موقفة وما أسوي شي، حتى التيزرات حاولت أنزلها أسرع من كذا وبشكل أفضل مع بعض الشرح والترجمات، بس ما قدرت للأسف كنت محبطة ومتكاسلة ومالي خلق، صدقوني تزير تشين وسيهون بالعافية نزلتهم أمس والله، والرسالة هذي قعدت أكتب فيها ليومين تقريباً.

أنا في الوقت الحالي ماعندي جدول مهم، قاعدة في البيت لين ماربي يفرجها وأقدر أدخل جامعة (إن شاء الله) وماعندي وظيفة أو شغل، أحياناً أنشغل بأعمال البيت (طبخ، غسيل، تنظيف وغيره) أو أنشغل بمتابعة أخبار اكسو على تويتر وانستا أو أسلي نفسي بالتلفزيون والبرامج، يعني مشكلتي ليست الوقت أو الإنشغال، مشكلتي هي الدافع والمحفز. الدافع شي مهم بالنسبة للأدمنز، وهذا شي انتوا لازم تعرفوه، لازم يكون في شي محفز لاستمراريتنا في الترجمة وتنزيل الأخبار وكتابة تدوينات للترفيه والتسلية، بس الدافع أو المحفز هذا صار قليل جداً ويكاد يكون معدوم.

ايش هو قانون نيتون الثالث؟     “لكل فعل ردة فعل مساويه له في المقدار ومعاكسة في الاتجاه”

لما أنا أنزل مقالة والتفاعل يكون ضعيف طبيعي جداً مع الوقت ترجمتي وتفاعلي في المدونة يقلوا ويجي يوم ما عاد أسوي شي وأوقف تماماً وأصير مجرد اسم مكتوب في قائمة الأدمنز، وأنا ما أريد أوصل للمرحلة هذي إني اختفي بدون توضيح أو ’وداع’ عشان كذا قررت أترك المدونة وأكتب لكم رسالة قبل ما ينمسح اسمي من قائمة الأدمنز.

.

رابعاً، انسحابي من المدونة لا يعني خروجي من الفاندوم او توقفي نهائياً عن الترجمة~

أنا انسحبت من المدونة، لكن هذا الشي ما يعني إني طلعت من الفاندوم أو تخليت عن كونس اكسوإل، لا~ أنا راح أظل اكسوإل وأحب اكسو ولسه أتابعهم وحبي لهم يمر بحالة ازدياد وتضاعف مستمر.

أيضاً، ما ارح أتوقف بشكل نهائي عن الترجمة، في النهاية الترجمة هوايتي، أحب الترجمة وخصوصاً بمواضيع تتعلق بـ EXO، عشان كذا بعد ما آخذ فترة راحة، ممكن أرجع أترجم على تويتر؟ للآن بصراحة ماعندي فكرة تتعلق بالموضوع، كنت أفكر أسوي حساب عل تويتر يكون خاص بي أترجم فيه مقالات بين فترة وفترة، بس هذا شي صعب لأنه التفاعل بيكون برضو 0 وصارت في حسابات كثير تترجم أخبار اكسو على تويتر، عشان كذا ماعندي قرار معين أو ثابت بخصوص الأمر، لكن المتأكدة منه إني برجع اترجم بعد فترة وإذا كان هذا شي يناسبني.

.

و أخيراً، أنا دائماً بظل شاكرة للأدمنز وللمتابعين اللي حاولوا معاي، أعتذر بصدق وأتمنى تسامحوني~

بالرغم من إني متاكدة إنه خروجي من المدونة هو أنسب قرار لي وللمدونة نفسها، إلا إنه مازلت أحس بالذنب لما أفكر بالأدمنز الباقيات (أنيسة، هديل ورغد….)، إني أترك المدونة في ظل هالظروف شي صعب علي وعليهم، لكن في النهاية أنا لو ما إتخذت هذا القرار بظل أعاتب نفسي لأني ما بترجم شي ولا بنزل شي وبصير مثل المزهرية اللي بدون ورود، وجودها لا معنى له. لكن انا متأكدة إنه الأدمنز مقدرين لأنهم أدرى وعارفين أكثر وعايشين الوضع معاي كأدمن.

أنا فعلاً شاكرة لهم (الأدمنز) لوقوفهم معاي في الأوقات اللي كنت محتاجة لهم فيها، انا قبل صار لي موقف وكنت حاسة بالإحراج والخجل من نفسي لاني اقترفت غلط أقل ما يقال عنه سخيف وأحمق، هذاك الوقت أنا كنت خايفه أصارح الأدمنز ويزعلوا مني أو ياخذوا موقف ويفكروا إني إنسانة غبية أو حمقاء (الموقف ما له دخل بمدونة اكسو، لكن مدونة أخرى) مع ذلك صارحتهم لأاني خفت حد ثاني يقول لهم ويزعلوا اكثر فاعترفت بغلطي وهم بشكل ماتوقعته وقفوا معاي وحاولوا انهم ينصحوني ويساعدوني، هذا أكثر شي ما أقدر أنساه لهم، مع اني كنت مستصغره نفسي وقتها وندمانه على غلطي السخيف إلا إنهم خلوني أستوعب انه أي حد في مكاني كان من الممكن يسوي كذا.

أشكرهم من كل قلبي لأنهم أدمنز في مدونة EXO Arab Fans ولأنهم قاوموا وظلوا موجودين للحظة هذي، سواء أكملوا طريقهم مع المدونة أو انسحبوا منها بظل شاكرة لهم، ولأنهم حاولوا بكل ماعندهم إنهم يعطوا المدونة كل الحب والتقدير ويوصلوها لأعلى مراحلها، حتى لو إن المدونة الآن ما عادت زي أول بس ما ننسى في يوم انها كانت مصدر أول لبعض المتاعبين، وأحب أقولهم إني آسفه فعلاً وحاولت أعبر لهم عن كل مشاعري وأفكاري من خلال هذي الرسالة~ أحبكم.

بالنسبة للمتاعبين، أعتذر لكم وأقول أنا آسفة، أتمنى تتفهموا موقفي، والأهم من هذا كله إنكم تظلوا تدعموا المدونة، حتى لو بين فترة وفترة، وحتى لو قلت الأخبار والمقالات اتمنى إنكم ما تنسوا في يوم تعب أي أدمن كانت أو مازالت موجودة هنا وحاولت إنها تقوم بشيء للمدونة.

أظل شاكرة لكم دائماً ولوقفتكم معاي لما كنت محبطة في وقت سابق ومحاولاتكم اللي أقدرها كمتابعين عشان أستمر معاكم في المدونة، تعليقاتكم وأفكاركم وكلماتكم اللي أسعدتني بعد كل مقالة ترجمتها أو تدوينة نزلتها لكم. أنا ذكرت بعض المتابعين في رسالتي السابقة، بس مو حابة أذكر أحد معين الآن لأني أتكلم بشكل عام وكلامي موجهه للجميع. لكل شخص علق، لكل شخص شارك، لكل شخص ضغط على المدونة ودار فيها وقرأ أحبارها، لكل شخص دعمني وحاول إنه يكون دافع ومحفز لي في المدونة، أنا شاكرة لكم وجداً آسفة، دائماً وأبداً لا تنسوا إني أحبكم.

.

.

.

.

“لَحظات الوداع، هِي لحظات شبيهة بالصدق، كثيفه الفُضول بالِغة التوتر، تَختزل فيها التفاصيل التافِهة وتتعامل مع الجَواهر، وتتألقُ البصيرة وتتوهَج الرُوح.

لذا لا تَنسوا، أن بالآمالِ الحُلوة يصبح الفراقُ عِيداً”

.

.

أدمن: Jounex ✨

اليوم: الخميس

التاريخ: 30 نوفمبر، 2017

.

– انتهى –

.

.

.

.

.